Այսօր Մեսրոպ Մաշտոցի անվան համալսարանին կից բազային քոլեջի  միջավայրը  լի էր նոր շնչով ու գույների ներդաշնակ համադրությամբ․ կարծես ժամանակը մի պահ կանգ էր առել՝ տեղը զիջելով արվեստին ու Սայաթ-Նովայի հիշողությանը։ «Կառավարում/Մենեջմենթ» մասնագիտության առաջին կուրսի դասախոս Լիլիթ Գուրուրյանը   ուսանողների հետ կազմակերպել է բաց դաս՝  «Սայաթ-Նովա» խորագրով, որը հիշեցնում էր փոքրիկ մշակութային ներկայացում ։

Աշուղ-բանաստեղծի կերպարը կենդանացավ ուսանողների խոսքում․
նրանք ներկայացրին բանաստեղծի կյանքը, ստեղծագործական աշխարհը, երգերի հոգևոր խորությունը։ Բայց ամենագեղեցիկ պահը դեռ առջևում էր․ բեմականացում Սայաթ-Նովայի և գոզալի՝  Աննայի հանդիպումից։ Ուսանողները ոչ միայն ներկայացրին, այլ զգացին ու փոխանցեցին այդ հանդիպման նրբությունը՝ հուզական ու իրական։

Հնչեց Սայաթ-Նովայի անմահ ստեղծագործություններից  «Աշխարհումս իմն դուն իս» տաղը։
Մեղեդին տարածվեց լսարանում՝ ստեղծելով այն զգացումը, թե ժամանակն ու արվեստը միախառնվել են մեկ շնչի մեջ։ Ցուցադրվեց «Սայաթ-Նովա» ֆիլմից մի հատված, որն ավելի ամբողջական դարձրեց աշուղի կերպարը՝ թույլ տալով տեսնել ոչ միայն բառը, այլ նաև կերպարի շունչը։

Լսարանի ձևավորումը բխում  էր թեմայի բովանդակությունից․ քամանչա , մեղմ լուսավորություն, սահիկաշար, թղթապաստառներ։Ապահովվեց միջառարկայական կապ․  Սայաթ-Նովայի դարաշրջանում գոյություն ունեցող հասարակարգերի , դրանց գաղափարական հիմքերի ու  մշակույթի վրա ազդեցությունները , որտեղ գրականությունն իր ձեռքը մեկնեց արվեստին, իսկ պատմության վրա լույս սփռվեց ։

Այս բաց-դասը մեկ անգամ ևս ցույց տվեց, որ մշակույթը կենդանի է, երբ այն ապրեցնում են երիտասարդները։

Առաջին կուրսը համոզեց՝ Սայաթ-Նովան դեռ խոսում է, երգում է, ապրում է, միայն պետք է սրտով լսել։

Մեսրոպ Մաշտոցի անվան համալսարանի «Սերվիս» և  «Օտար լեզուներ» մասնագիտության ուսանողները հերթական անգամ հնարավորություն ունեցան ուսումնական գործընթացը համատեղել իրական գործնական փորձի հետ․ նրանք այցելեցին  «Հոլիդեյ Ինն Երևան» հյուրանոց։

Այցի ընթացքում ուսանողները ծանոթացան հյուրանոցային բիզնեսի կառուցվածքին, սպասարկման բարձր ստանդարտներին, աշխատակազմի պարտականություններին և միջազգային հյուրերի ընդունման առանձնահատկություններին։ Հյուրանոցային մարքեթինգի, հաճախորդների սպասարկման և միջազգային հաղորդակցման ոլորտների մասնագետները ներկայացրին իրենց աշխատանքային փորձը՝ ընդգծելով մասնագիտական հմտությունների, լեզվի իմացության և ծառայությունների որակի կարևորությունը։

Ուսանողները նաև շրջեցին հյուրանոցի տարբեր բաժիններով՝ ընդունարան, սննդի կազմակերպման բաժին, կոնֆերանս-դահլիճներ և սենյակների սպասարկման հատված։ 

Այցը ոչ միայն կրթական, այլև մոտիվացիոն նշանակություն ուներ, քանի որ ուսանողները իրենց աչքով տեսան, թե ինչպես են դասական տեսական գիտելիքները կիրառվում գործնական իրականության մեջ։
Այսպիսի ճանաչողական այցերը նպաստում են ուսանողների մասնագիտական հորիզոնի ընդլայնմանը, հաղորդակցական և մասնագիտական հմտությունների զարգացմանը, ինչպես նաև կարևոր դեր են խաղում նրանց կարիերայի ձևավորման գործընթացում։

Մեր ուսանողները շարունակում են ունենալ  բացառիկ հնարավորություններ՝ շնորհիվ մեր գործընկերների հետ արդյունավետ համագործակցության։ Այդ նախաձեռնությունների շարքում առանձնանում է Qatar Student Club-ը, որը ուսանողներին առաջարկում է տարբեր արտոնություններ և զեղչեր ճամփորդությունների ընթացքում։

Ստեղծելով հարթակ միջազգային փորձի, մշակութային փոխանակման և նոր ծանոթությունների համար՝ Qatar Student Club-ը նպաստում է ուսանողների անձնական և ակադեմիական զարգացմանը։

Մեր համալսարանում տեղի ունեցած հանդիպման ընթացքում ուսանողները հնարավորություն ունեցան անմիջապես ծանոթանալ ակումբի գործունեությանը, արտոնություններին և անդամակցության գործընթացին։
Այս նախաձեռնությունը ևս մեկ քայլ է դեպի այն, որ մեր ուսանողները դառնան գլոբալ կրթական համայնքի լիարժեք անդամներ։

Մեսրոպ Մաշտոցի անվան համալսարանի դասախոս Նատալի Գևորգյանի դասընթացի շրջանակում հոգեբանության երրորդ կուրսի ուսանողները ներկայացրին հայ մեծ բանաստեղծ Վահան Տերյանի կյանքն ու ստեղծագործական ժառանգությունը։

Սակայն հանդիպման հիմնական շեշտադրումը արվեց ոչ թե կենսագրական փաստերի, այլ Տերյանի պոեզիայի հոգեբանական ազդեցության վրա։ Ուսանողները փորձեցին բացահայտել, թե ինչպես է բանաստեղծի խոսքը հուզական և ենթագիտակցական մակարդակներում ազդում ընթերցողի վրա՝ ձևավորելով ներաշխարհի ներդաշնակություն, խորը զգացմունքայնություն և ինքնաճանաչման գործընթաց։

Քննարկման ընթացքում վերլուծվեցին Տերյանի բանաստեղծություններում արտացոլված տխրության, երազի և հոգու նրբազգացության թեմաները՝ դիտարկելով դրանք որպես հոգեբանական ապրումների վերարտադրություն և հոգևոր ինքնամաքրումի ձև։

Դասընթացը վերածվեց մտորումների հարթակի, որտեղ ուսանողները փորձեցին հասկանալ, թե ինչպես է պոեզիան դառնում ոչ միայն գեղարվեստական արժեք, այլ նաև հոգեբանական թերապիա, որը կարող է բուժել, հանգստացնել և օգնել մարդուն գտնել սեփական ներքին հավասարակշռությունը։

Այսպիսի նախաձեռնությունները ևս մեկ անգամ ընդգծում են արվեստի և հոգեբանության սերտ կապը՝ ցույց տալով, որ բառի ուժը հաճախ ավելի զորավոր է, քան ցանկացած հոգեթերապևտիկ միջամտություն։

Այսօր Մ․ Մաշտոցի անվան համալսարանում  հյուրընկալել էինք սիրված բանախոս, լեզվաբան և հանրային խոսքի մասնագետ Էմմա Նոնինյանին։ Նրա դասախոսությունը՝ «Հայոց լեզուն՝ որպես հաջողության բանալի», դարձավ ոգեշնչող ու մտորելու տեղիք տվող հանդիպում բոլոր ներկաների համար։

Էմմա Նոնինյանը խոսեց հայոց լեզվի հզորության, բառի ուժի և մեր ինքնության մեջ լեզվի բացառիկ դերի մասին։ Նա ընդգծեց, որ հայերենը ոչ միայն հաղորդակցության միջոց է, այլև մտածողության ձև, ինքնավստահության աղբյուր և հաջողության ճանապարհի անբաժան մաս։

Դասախոսության ընթացքում բանախոսը ներկայացրեց հետաքրքիր օրինակներ այն մասին, թե ինչպես կարող է ճիշտ ու գրագետ խոսքը բացել նոր հնարավորությունների դռներ՝ թե՛ մասնագիտական, թե՛ անձնական կյանքում։

Հանդիպման ավարտին ներկաները ունեցան հնարավորություն ուղղելու իրենց հարցերը, կիսվելու մտքերով և շնորհակալություն հայտնելու Է․ Նոնինյանին հետաքրքիր, կենդանի և ոգևորող խոսքի համար։

Այսպիսի միջոցառումները ևս մեկ անգամ հիշեցնում են, որ սիրելով և զարգացնելով մեր մայրենի լեզուն՝ մենք զարգացնում ենք ինքներս մեզ։

Ինչպես խոստացել էինք, կիսվում ենք Ֆինանսական համակարգի հաշտարարի հետ մեր հանդիպման մանրամասներով։

Հանդիպումը նպատակ ուներ խորացնել մասնակիցների գիտելիքներն ու իրազեկվածությունը ֆինանսական վեճերի կարգավորման ժամանակակից մեխանիզմների մասին՝ հատկապես Հաշտարարի  դերի և գործառույթների համատեքստում։
Քննարկման ընթացքում անդրադարձ եղավ մի շարք կարևոր և արդիական թեմաների՝

• ե՞ րբ և ինչպիսի՞ իրավիճակներում կարող է քաղաքացին դիմել Ֆինանսական համակարգի հաշտարարին,

• ինչպե՞ ս է կազմակերպվում և իրականացվում հաշտարարի կողմից գործի քննության ընթացակարգը,

• ո՞ ր փուլերում և ի՞ նչ ժամկետներում են իրականացվում համապատասխան գործողությունները,

• ինչպե՞ ս է ապահովվում կողմերի իրավունքների պաշտպանությունը և անաչառ վերաբերմունքը,

• ինչպես նաև՝  ի՞ նչ իրազեկման ծրագրեր ու նախաձեռնություններ են իրականացվում հանրության ֆինանսական կրթության և իրազեկության մակարդակը բարձրացնելու նպատակով։

Հանդիպման ընթացքում մասնակիցները հնարավորություն ունեցան ուղղել իրենց հետաքրքրող հարցերը, ստանալ գործնական օրինակներով հստակեցված պատասխաններ և հասկանալ, թե ինչպես է Հաշտարարի գրասենյակը նպաստում ֆինանսական համակարգում վստահության ամրապնդմանը։
Դասընթացը ոչ միայն տեղեկատվական էր, այլև գործնական՝ նպաստելով մասնակիցների իրավագիտակցության բարձրացմանը և ֆինանսական ոլորտում իրենց պաշտպանվածության զգացողության խորացմանը։

Շնորհակալություն ենք հայտնում Ֆինանսական համակարգի հաշտարարի գրասենյակին արժեքավոր և ինֆորմատիվ հանդիպման, ինչպես նաև մասնագիտական գիտելիքների և փորձի փոխանակման հնարավորության համար։

Այսօր Մեսրոպ Մաշտոցի անվան համալսարանում կայացավ յուրահատուկ և ներշնչող հանդիպում՝ «Շելբի Տուր» զբոսաշրջային կազմակերպության տնօրեն Մարինե Ավետիսյանի հետ։ Հանդիպմանը մասնակցեցին քոլեջի և համալսարանի Զբոսաշրջություն և Սերվիս մասնագիտության ուսանողները, ինչպես նաև դասախոսական կազմի ներկայացուցիչներ։Հանդիպման ընթացքում Մարինե Ավետիսյանը ներկայացրեց ընկերության պատմությունը, ձևավորման և զարգացման ուղին, խոսեց այն արժեքների մասին, որոնց վրա հիմնված է «Շելբի Տուր»-ի հաջողությունը՝ հաճախորդակենտրոն մոտեցում, պատասխանատվություն և նորարարություն։Զրույցը վերածվեց հետաքրքիր քննարկման, որտեղ ուսանողները հնարավորություն ունեցան հարցեր ուղղելու զբոսաշրջության ոլորտի արդի միտումների, ճամփորդությունների հոգեբանական և մշակութային ազդեցության, ինչպես նաև արտագնա և ներգնա տուրիզմի զարգացման հեռանկարների շուրջ։Մարինե Ավետիսյանը ընդգծեց, որ ժամանակակից մարդը ճամփորդության միջոցով որոնում է ոչ միայն նոր վայրեր, այլև ինքնաճանաչում, փորձի և տպավորությունների կուտակում։ Նա նաև խոսեց ընկերության կառուցվածքի և գործունեության ուղղությունների մասին՝ ներկայացնելով, թե ինչպես է «Շելբի»-ը մշտապես ընդլայնում իր հնարավորությունները և բարձրացնում ծառայությունների որակը։Հանդիպման ընթացքում ուսանողներին առաջարկվեց նաև հատուկ պրոմոկոդ՝ «Շելբի Տուր»-ի միջոցով ճամփորդելու և ընկերության ծառայություններից առավել մատչելի կերպով օգտվելու համար։ Բացի այդ, հայտարարվեց, որ համալսարանի ուսանողներին շուտով կտրամադրվի հնարավորություն պրակտիկա անցնելու և փորձի փոխանակման «Շելբի Տուր» ընկերության գրասենյակում։Այսպիսի հանդիպումները ոչ միայն նպաստում են ուսանողների մասնագիտական հմտությունների ձևավորմանը, այլև խթանում են նրանց մոտիվացիան՝ իրենց ապագան տեսնելու զբոսաշրջության հետաքրքիր և դինամիկ ոլորտում։

Օրերս կայացավ մեր հերթական բովանդակալից և արդյունավետ համագործակցային հանդիպումը մեր վաղեմի ու վստահելի գործընկեր «Ժեստ» հոգեբանական կենտրոնի թիմի հետ։ 

Այսպիսի միջոցառումները կարևոր դեր են խաղում ուսանողների մասնագիտական զարգացման գործում․ դրանք հնարավորություն են տալիս տեսական գիտելիքներն ամրապնդել գործնական փորձառությամբ, զարգացնել վերլուծական մտածողությունը և խորացնել մասնագիտական հմտությունները։

Մենք բարձր ենք գնահատում նման համագործակցությունները, որոնք նպաստում են կրթական միջավայրի հարստացմանը և մասնագիտական աճին։
Շնորհակալություն մեր գործընկերոջը ՝ հետաքրքիր քննարկման, փորձի փոխանակման և մշտական համագործակցության համար։

Այսօր Մ. Մաշտոցի անվան համալսարանի իրավագիտության և տնտեսագիտության մասնագիտությունների ուսանողները այցելեցին Հայաստանի Կենտրոնական բանկ։
Այցի շրջանակում նրանք ունեցան տեղեկատվական շրջայց, ծանոթացան հայկական դրամի ստեղծման և զարգացման պատմությանը, ինչպես նաև Կենտրոնական բանկի կառուցվածքին ու հիմնական գործառույթներին։
Շրջայցը նպաստեց ուսանողների մասնագիտական գիտելիքների խորացմանը և ֆինանսական համակարգի գործունեության վերաբերյալ պատկերացումների ընդլայնմանը։
Համալսարանը շնորհակալություն է հայտնում Հայաստանի Կենտրոնական բանկին բովանդակալից և ուսուցողական հանդիպման համար։

Մեսրոպ Մաշտոցի անվան համալսարանին կից բազային քոլեջի Դիզայն մասնագիտության երկրորդ կուրսի ուսանող Աբրահամյան Հայկը ճանաչվել է 2024-2025  ուստարվա լավագույն ուսանող ՝ ցուցաբերելով բարձր առաջադիմություն, ստեղծագործական մոտեցում և ակտիվ մասնակցություն ուսումնական գործընթացին։

Նրա նվիրումը և տաղանդը գնահատվեցին քոլեջի կողմից՝ Հայկին շնորհվեց պատվոգիր, ինչպես նաև 20% ուսման զեղչ (նախնական 10%-ին ավելացվեց ևս 10%)։ Շնորհավորում ենք Հայկին և մաղթում նորանոր հաջողություններ, ստեղծագործական վերելքներ ու շարունակական աճ դիզայնի աշխարհում։

Ուսուցչի տոն՝ երախտագիտությամբ ու ժպիտներով 

Երեկ Մեսրոպ Մաշտոցի անվան համալսարանին կից բազային քոլեջում տիրում էր տոնական և ջերմ մթնոլորտ։ Ուսանողական խորհուրդը կազմակերպել էր գեղեցիկ միջոցառում՝ նվիրված ուսուցչի տոնին։ 

Միջոցառման ընթացքում ուսանողներից մեկը, Կարաբալայի կերպարով, առանձնահատուկ գունեղությամբ ու հումորով դասախոսական կազմին հանձնեց ծաղիկներ՝ որպես շնորհակալության և հարգանքի խորհրդանիշ։ 

Այսօր ևս մեկ անգամ համոզվեցինք, որ ուսուցիչ լինելը պարզապես մասնագիտություն չէ, այլ առաքելություն՝ սեր, նվիրվածություն և հավատ սերունդների ուժի նկատմամբ։ 

Շնորհավոր տոնդ, սիրելի ուսուցիչ։ 

Մ․ Մաշտոցի անվան համալսարանին կից բազային քոլեջի  Դիզայն մասնագիտության ուսանողները իրենց խորհրդատու Ա․ Խաչատրյանի ուղեկցությամբ այցելեցին Երևանի ժամանակակից արվեստի թանգարան, որտեղ ուսումնասիրեցին արվեստի տարբեր ճյուղերին վերաբերող գործեր , եղան նաև թանգարանին կից գործող ճապոնական արվեստին վերաբերող պատկերասրահում և տարբերակելով, համադրելով, զանազանելով ՝ ուսանեցին և ընկալեցին արվեստի տարբեր շերտերի նրբություններն ու գունային զանազանությամբ աչքի ընկնող գլուխգործոցները։

Մեսրոպ Մաշտոցի անվան համալսարանին կից բազային քոլեջում կազմակերպվեց տոնական միջոցառում՝ նվիրված Հայաստանի Հանրապետության Անկախության օրվան։ Միջոցառման ընթացքում ուսանողները և դասախոսները միասին կարևորեցին մեր անկախ պետականության արժեքը՝ որպես ազատ և արժանապատիվ կյանքի հիմնասյուն։

Բեմում հնչեցին հայրենասիրական երգեր ու բանաստեղծություններ, ներկայացվեցին պատմական դրվագներ՝ հիշեցնելով անկախության ճանապարհի դժվարությունները և հաղթանակները։ Երիտասարդները մեկ անգամ ևս ընդգծեցին այն գաղափարը, որ անկախությունը ոչ միայն պատմական ձեռքբերում է, այլև ամենօրյա պատասխանատվություն։

Միջոցառման գլխավոր ուղերձը դարձավ կոչը՝ ապրել և ստեղծագործել մեր անկախ հայրենիքում, պահպանել ու զորացնել այն՝ հանուն ապագա սերունդների։